---
title: "DRONA KANNAR FJARHITALEIÐINGINA"
description: "Ein drona fer komandi tvær vikurnar at flúgva yvir fjarhitaleiðingini í høvuðsstaðnum, tá veður og vindur loyva tí."
date: "2025-07-02"
created: "2025-07-02"
---

# DRONA KANNAR FJARHITALEIÐINGINA

Ein drona fer komandi tvær vikurnar at flúgva yvir fjarhitaleiðingini í høvuðsstaðnum, tá veður og vindur loyva tí. Talan er um eitt termiskt eftirlit, sum kann staðfesta møguligar skaðar ella lekar í fjarhitaskipanini

Fjarhitaleiðingin í Havn skal eftirkannast við dronu tíðarskeiðið 25. juni til 2. juli, í tíðarbilum frá kl. 00.00 - 05.00. Dronan hevur ein termiskan sensor, ið mátar hitageislingar frá fjarhitarørunum, og kann staðfesta, um hitin er ov høgur á ávísum støðum. Um leiðingin er ov heit, so eru sannlíkindi fyri skaða og hitamissi ella veikleikum, har lekar kunnu koma á leiðingina. Talan er um grafiskar myndir og ikki um vanligar myndir.

- Hetta er ein skjótur og beinrakin máti at finna møguligar skaðar í skipanini. Soleiðis slepst undan at grava óneyðuga stórt øki upp, um vit fáa illgruna um skaðar, sigur Hans Christian Dam, stjóri í Fjarhitafelagnum.

Kanningarnar skulu fara fram undir ávísum veðurumstøðum fyri at fáa besta úrslitið. Tað skal vera kalt, t.e. -5 til +8 stig, og tað skal vera turt. Vindferðin skal vera í mesta lagi 6 m/sek, fyri at dronan kann hava eina støðuga flúgving, og vætan í luftini skal vera minni enn 90 prosent. Flogið verður í 80-120 metra hædd.

Hitaleiðingin hjá Fjarhitafelagnum er umleið 30 kilometrar til longdar. Hon strekkir seg frá Sundsverkinum og Brennistøðini á Hjalla niðan í Hoyvíkar og haðani ígjøgnum Gundadal oman í miðbýin. Harumframt eru økini við Glasir og oman eftir Landavegnum og økini undir Kongavarða og við Klingurstjørn eisini partar av fjarhitaskipanini. Fjarhitaleiðingin skal komandi árini bindast saman í eina samlaða hitaleiðing fyri høvuðsstaðin – eisini við fleiri nýggjum útbyggingum.

![](https://www.fjarhiti.fo/i/MOLIRIMEDIA/159d08c7-1ace-49cb-2808-08dda22a7775?width=800)